Legendary Ram Jethmalani nghilh loh nan

India ram a lawyer fee sang ber tia hriat thin Ram Jethmalani fee  chawhrual hi vawi khat din ah (per appearance chauh) cheng nuai 25 ni  a sawi a ni.  Lawyer/ukil a nihna anga legal profession a a sulhnu aia nep lo hi politician a nihna ang a sawi tham a awm.

Pa thawm na, pa maksak leh tawngkam bungraw thlum lo leh tlang zet, Ram Jethmalani hi 'Algebra' ah Shoma Choudhury-in "Mi thalo i dinsak ho zingah hian tunge fee i laksak hnem ber ang" tia a zawh khan chil pawh lem hmasa lek lo hian Ram chuan " He'ng ho hnen atang hian sum tam tak ka la alawm, mah se ka case za a sawmkua hi a thlawn a ka dinsak an ni" a ti hmiah. He criminal lawyer chungchuang hian misual tan a ding thin ni a zawhna chungchang a dawn fo thin ah chuan misual an nih leh nih loh tehtu tur a ni lova, misual nia puh te hian  an thiamthu sawina tur chanvi an nei tur a ni a, chu mi lo tih ve mai chu a mawhphurhna a nih thu a sawi.

He pa maksak, Ram hian kum 17 a nih in law a zir zo a, ukil hna thawk turin a kum in a la tlin loh avangin Chief Court, Sindh (tun a Pakistan ni ta, A biography ziaktu Susan Adelman ziah dan chuan High Court of Sindh) Chief Justice, Godfrey Davis hmaah amah leh amah a in ukil chawp a, law a zir laiin kum 21 chin tih dan a awm lova (retrospective effect) hman theih a nilo tiin tan a khawh a...Bar Council hruaitute koh an ni a, anni chuan kum tal tling se an ti a kum 18 a nih chuan ukil a tang thei turin a insawilut zan...

A thianpa, AK Brohi nen Brohi & Co. Law firm an din a, a dawrtu hmasa pa pakhat midang hnena a ram luahchhawn tirtu mangang tak chu fee atan  cheng khat an laksak.

India leh Pakistan inthen hnuah India ram a lo lut a, khatih laia raltlante chu nasa taka tihduhdah niin harsatna tamtak an tuar a...Bombay Refugee Act khinna chu chu Bombay High Court ah a pu lut a, a chak pui zui...Nanavati Case, tualthahna chungchang ah sawrkar lam ukil (Public Prosecutor) a dinpui na chu a larpui lehpek hle a, he thilah hian 'ka ring ka rawlh ve na chu tlem tham te chauh a ni' tiin a uang duhlo tlat thung...

Rajiv Gandhi thahna te, Jayalalitha eiruk thubuai te, Bihar Fodder Scam ah Lalu Prasad Yadav a dinsak te, 2G Spectrum te, 2001 Parliament Attack case, Jessica Lal murder case te,  Arun Jaitley an Kejriwal a khinna te kha a case langsar tamtak zing a thenkhat a ni. 2001 Parliament Attack case ah hian Delhi University Professor pakhat chu pawikhawihtu te puitu ah puh niin phone a inbiakna chungchang finfiahna nia sawi chu phetthla in thiam a chanpui nghe nghe...He Professor hi he thilah hian a inrawlh lo niin a ring tlat a, Quran nemin a inrawlh lo tih thu a chhamtir niin an sawi.

Ram hi pa ngilnei tak a ni a, chhang a lei teuh a a lirthei darthlalang bula lo kal riltam te chu a sem thin. Delhi leh Mumbai a in ah chuan mi hrang hrang an riak nghuk thin niin a biography, ' The Rebel A Biography of Ram Jethmalani' ah chuan U.S lamah raltlana a awm laia a thleninnu Susan Adelman chuan a ziak.

Indira Gandhi hunlaia Emergency a puan kha a tuartu leh tawng nasa ber zing a mi a ni hial awm e. Indira Gandhi dan kalh a thlan tlin a nih chungchangah Raj Narain-an Allahabad High Court ah  thubuai a theluh khan Indira Gandhi chu thiamloh chantir a ni chho ta mai a...Indira Gandhi chuan President bia in Emergency puan a ni ta a, India Danpui chu khawih danglam niin Indira Gandhi chuan a dinhmun sawhnghehna turin a in vur chho a...Hemi leh a hnu lam zel a politics leh India danpui inchawmpawlh chho vel hi Ram Jethmalani a political leh legal career thialpawlhtir tu leh amah siamtu leh nawrkaltu pawimawh pahnih a ni zui ta zel a ni.

U.S ah politics thil a raltlan ( exile) in hun engemawchen a awm a, US in Emergency laia political asylum hmu hmasa ber a ni a. Wayne State University Law School ah hun engemawchen a thawk a ni. Indira chuan Washington a India palai a hnuhkir phah nghe nghe.

US atanga a lo let hnuin Law Minister, HR Gokhale, amah manna tur lehkha a iptea kawltu nia a sawi chu inthlanah a rawn hneh zui a. Union Law Minister leh Urban Minister a ni zui bawk.

Hemi hnu hian legal profession a thawh chhunzawm zel a,  Bar Council of India Chairman leh Supreme Court Bar Association President te lo ni tawh Ram Jethmalani chuan kum 2017 khan legal profession chu a chawlhsan a. Ni 8, September, 2019, Pathianni tuk ah khan hun engemawchen bawksawpa a awm hnuah kum 95 mi,  Ram Jethmalani chu kan chan ta.

Ram hi kawng thenkhatah pa maksak leh khawsak phung herh angreng tak, kawng thenkhat ah pa ngilnei tak, thenkhatah pa tawngkam hriam leh kam thlum lo zet mai a nihna lai te hi amaha mi mit fukna tak a ni. Black Money chungchangah Supreme Court a thubuai ngaihtuah a nih lai te khan Judge ten sana an en a hmuh chuan , " In hah tawh em ni? Ka kum zatve in nih kha" a ti mai a ni awm e.

Amah ngeiin heti hian a sawi " Ka dik in ka fel vek hauh lovang, keimah minseltute pawhin an phat theih hauh loh tur erawh chu ka thusawi leh thiltih te hi ka thinlung takin inpekna leh tihtakzeta ka tih an ni" a tih hi kan entawn tlan atan a duhawm hle.