Naktuka fam tur ni ila...

Hmasang Greek pasaltha rothap, Achilles meuh pawh khan naktuka fam chang thei a ni tih hi a lo ngaihtuah ve roh roh thin a. Chu chuan a vawiin hun hlutzia a hriatchiantir a, am takin a hun hman mek kha a a chelh a, a chen a ni. Briseis hnenah khan heti hian a sawi a. “Thuruk ka hrilh ang che. Biakbukah te pawh an hrilh ngai loh che. Pathiante khian min thik asin. Keini zawng, fam chang thei kan nih vang hian min thik asin. A chhan chu maw, eng hun mai pawh hi kan hun hnuhnung ber a ni thei asin. Awngrawp mai thei kan nih vang hian  engkim mai hi a mawi zual bik asin. Tun ang ai reng hian i mawi tawh ngai dawnlo asin. Tun hun hi kan ko kir leh tawh ngai dawn si lo.” ‘Pathiante’ meuh pawhin an thik khawp fam chang thei bik nihna hi engtiang taka hlu nge a nih a, hringnun chhiar thiamna turin engtianga pawimawh nge a nih ang le?

Thihna hi tumahin kan chunga thleng tur a kan duh loh ni mah se engtik niah emaw chuan kan la thi ngei dawn a ni tih hriatna hian vawiin hun hi am takin min hman tir a, a hlutzia min hriattir thin a nih hi.

Steve Jobs khan Harvard commencement speech ah khan heti hian a lo sawi bawk a. “Kum 17 mi ka nih lai khan thuziak pakhat ka chhiar a, hetiang hian a inziak a, " Nitin hi i ni hnuhnung ber tur angin hmang la engtik niah emaw chuan i dik chek ang” tiin. Chumi hnu kum 33 chhung chu tuktin hian darthlalangah in en pahin, " Vawiin hi ka ni hnuhnung ber ni dawn se enge tih ka duh a enge ka tih ang vawiin ah hian" tiin ka inzawt thin. Ka la thi thuai dawn a ni tih inhriatna hian hringnuna thutlukna lian pawimawh ber ber siam tura min puitu tangkai ber a ni. A chhan chu pawnlam thil engkim mai, chapona te, hlawhchham hlauhna te hi thihna kotlangah chuan an thlawk bo a, thil pawimawh tak tak chiah a chambang  a ni”.

He khawvel, chintawk nei lova kan duh belh zelnaah hian a tha zawk leh chungnung zawk nih tumin kan mihring pui te kan pal tlu pheng phung thin a, kan hmangaih te ngei pawh kan hliam fo thin. Kan dam hlen dawn lova, engtik niah emaw chuan kan la thi dawn a ni tih theihnghilh khawpin kan buai fo a. Dam hlen tum ang hrimin hringnun kan chhiar fo thin. Chu chuan vawiin hun hlutzia te, chapona te, elrelna te, in beih sawk sawka in hliamna atan a uiawmzia hre theilo khawpin kan mit a tidel fo thin.

Naktuka fam chang thei kan nih hi hre thar fo ila, vawiin hun hi inhliama, in beih nan hmang lovin in hmangaih tawnna hun atan am takin kan hmang awm si a.

Amah, K. Hminga bawkin heti hian a rawn funkhawm a :

 

“Huatna nen hringnun chhiar chu,

Dam chhan a awm lo mang e,

Tia hmangaihna hlutzia ka chhiar thiam meuh chuan,

Ka hringnun hi vuiliam a hun tawh ang”