A rel sual em ni?

“Thinlai a na em a,

 Khuanu i rel sual em ni

 Ka ti mai dawn asin ?”

Nu leh pa tan chuan mahni ril a rah ngei mai channa hi a na hle ang a, a nat dan chu thalai, nu leh pa dinhmun a la ding lo chuan kan tawmpui phak lo hial zawk ang. 

He hla hi nu pakhatin a fa, a hmangaih em em mai thihna avanga a  tawrhzia puanchhuahna a ni a, a lungngaihna chuan a vawrtawp a thlen avangin Pathian hnenah zawhna zawtin, “Lalpa i rel sual em ni?” han tih a tum rum rum a. Chutianga a ngaihtuahna in kil tin kil tang a dap lai pawh chuan Pathian chu han dem a han cho rual ni lova a inhriat si avang chuan inthlahrung takin “ka ti mai dawn asin?”  tiin a la rawn zui ta hram hram a ni.

Engtin emaw engtiang emaw takin harsatna hi tawng lo fa kan awm awm love. Kan duh hauh loh leh tum hauh loh zawng a thil a han kal emaw, thil duhawm lo a thlen chang hian Pathian hian a rel sual ta mai emawni han tih ut ut mai a awl chang a awm thin. Chutiang hunah chuan kan chhungril tak atanga Pathian chu engkim chunga thuneitu leh roreltu ( sovereign) a nih vang a kan cho phak rual loh a nihzia hriatna eng de ve ve thin hi thil ropui tak a ni awm e.

Mari kha nula fel leh thianghlim niin Josefa pawh kha tlangval fel tak a ni a. Inneih tum a ruahmanna an siam hnuah Mari kha a rai tur thu Vantirhkoh in a han hrilh mauh mai te kha dawnsawn thiam a harin thenawm khawveng mitmei ven a na ngawt ang. Nula tlangval te hian an dinhmun turah khan han inchan ila thil paltlang chakawm tak a ni hauh lovang.  Pathian hian a rel sual ta mai em ni tia inzawh mai a awl rum rum ang.

 Nimahsela an chunga roreltu engkim chunga thuneitu Pathian remruatna leh ruahmanna chu an hnial rual a ni lova, Mari’n Vantirhkoh Gabriela a chhanna ah pawh khan chiang takin kan hmu. Kan duh loh leh kan tum loh anga thil a lo thlen chang pawh hian Pathian thuneihna leh Pathian remruatna zawk lam hi kan thlir thin a va tul tak em.

Joba kha Setana pawhin fiah atana a thur chhuah ngat, a fiahna a paltlang zawhloh chuan  Pathian a chona ah khan dingchang tura indah phah na atan hman tur khawpin Joba kha mi bik a ni. A ro tamtak a chan a, a fa te a chan a, a chhip atanga a ke ler thleng pan chhia in a bawm bawk a. A nupui khan Pathian sawichhia a thi mai zawk turin a rawn nghe nghe a nih kha. A nupui, amah hmangaihtu pawhin chuti reng reng a hrehawm chu a hmuh theihloh khawpa hrehawm tuartu dinhmunah chuan han ding ve ila, Pathian hian a rel sual em ni kan ti ve rum rumin a rinawm.

Chu dinhmunah pawh chuan Joba chuan a chunga thil thlen chhan te, Pathianin chutiang thlen a phal chhan te chu a hre kilh kelh hauh lovang. Nimahsela, “Lalpan a pe a, Lalpan a la leh ta, Lalpa hming chu fakin awm rawh se” a ti mai zawk a ni. Engkim chung a thuneitu thuneihna leh Amah hmufiahtu chuan an tawrhna leh channa lam aiin a thuneitu leh Chunglam zawk an en a an harsatna leh an tawrhna lam aia lian zawk an hmu thin a lo ni. 

Kan nun ah hian harsatna leh vanduaina a thlen chang te hian Pathian hian a rel sual ta nia ngaih a awl rum rum thin. Nimahsela kan damchhung tawite a kan thil tawn hi chatuana kan tawn tur laka chhut chuan thawnthu bu phek khatna ang chauh a ni a. Thawnthu bu hi phek khat chauh chhiarin thutlukna siam ila, a ziaktu chuan a ziak sual a ni ti ila a dik lovang, a thawnthu pum kan hriatloh avangin.

Thuhriltu  lar, apologetics lama thawhhlawk tak, Ravi Zacharias khan natna leh harsatna Pathianin a thlen a phal chhan chungchang an zawh khan heti hian a chhang a, “ Alien hian nu pum chhung ata  Doctor in naute a zai chhuak lai leh thisen baw nuai te, naute tap lai te lo hmu se Doctor chu sual a ti ngawt ang. Mahse, Doctor chuan a nihna takah chuan thil tha a ti zawk a ni. Nu leh pa te hian kan naupan laiin kan thil duhloh leh hrehawm kan tih min tihluihtirin min paltlang tir fo a, mah se a hnuah kan tan a tha tur a lo ni thin" tiin.

Chutiang deuh chuan kan hriatna leh kan hriatthiam chin zel hi kan hriatna leh thil tawn chawp zelin a hril avangin kan hriatna a tawi em  a, he hriatna tawi tak atang hian Pathian rorelna leh remruatna hi hriatfiah rual a nilo a ni.

Eng tikah emaw chuan he’ng harsatna leh manganna te kan tawh chang a chhanna kan neihloh te hi chhanna chu a famkimin kan la nei ang a. Hmaichhanah amah kan la tawk dawn a ni. Chumi hunah chuan Pathian hian a rel sual em ni tia zawh kan chak rum rum chang pawha inthlahrung taka “ka ti mai dawn asin” tia Pathian thuneihna leh chungchuanna kan zah hram hram thin te hian awmzia a la nei dawn a ni.