Kha tlangval vanduai kha

Zan dang ang lo takin khawlai chu a reh duk a, tlangval dawrawm lam, pawr deuh fap hi kun deuh ngai hian a rawn pai phei deuh chhak chhak a. Lamlian hrul a mi bathlar eng lai a thleng vel chiah tih chuan lirthei thar nalh ver vawr, a hma darthlalang a engemaw intar hi a rawn tlan phei a, chu tlangval zawn a thlen chuan a ding deuh hrawk a.

Chu lirthei atang chuan pa pakhat, la valai tak, inchei fai thlerh thlawrh, nghawngawrh awrh vang mai hi rang fahran hian a rawn chhuak a.

A ban chu a han lek uaih a, chu tlangval chu a vai thal tawp mai ang a tih tur khawp a khawng hian a han lek fua a, ral atang chuan ka lo au chhuak lo chauh a.

Chutiang a kut a thlak dawn emaw ka tih mek lai chuan chung lamah sang takin a ban a phar a, zawi te te hian an titi dun mawlh mawlh a, an tawngtai ni ngei hian a hriat a. Beng han dawh uluk deuh a han thlir uluk deuh bawk chuan tawngtai ni chiahlo hian thil engemaw chhampual vel hi an ni ta zawkin ka hria a.

Lirthei atanga lo chhuak zawk chuan a ban phar chu a han la thla a, tlangval dawrawm leh tawp tak mai nen chuan an thawmhnaw hak lai chu kawngkam ah chuan an in hak thleng ta mawlh mawlh mai a.

Thil fello a awm a ni ngei a ngaiin inrawlh a tul in ka hre ta a. Pan hnaih ka tum lai mek chuan chu tlangval dawrawm tak chuan a thawmhnaw hak thleng pui pa thawmhnaw chu a ha fel a, a nghawngawrh te a han awrh fel rual chiah chuan le…A au ta tuarh mai…”ka duh lo, ka duhlo… ka nu leh pa pawisa bak mi pawisa ka la ru ngai lo asin, ka ruih nan khan mi pawisa ka ru ngailo…hetiang te pawh hi maw!inthlakthleng leh ang” a ti tuarh tuarh mai a…

Zan dang ang chu nise an thawm te chu hria in mi tamtak an pungkhawm ngei ang. Mah se a reh duk mai. Mak tak maiin an nihna chu an inthleng a ni tih chu rinhlelh rual a ni ta lo. Lirthei atanga lo chhuak pa, pa valai tak chuan ‘ka rin ai chuan a lo zia daih hi’ ti rilru hmel hi a pu a, lungawi hmel deuh hian chu tlangval au tuar tuar chu a khapbet a. ” Bengchheng miah suh, ka thawmhnaw kha i ha tawh a, lungawi ve rawh, thildang kha mi bulah sawi lo la, khatiang bak khan miin an hmu dawn lo che, an awt dawn lutuk che” a ti sar sar a…

Chu tlangval chuan tap aw deuh beidawng deuh hian ” tinge a tirah khan i sawi ve mai loh, chhe takin min ngai a min rawn hau chiam chiam a, min inthlengpui leh tho si” a ti a…

Lirthei atanga rawn chhuak pa chuan ” I chhiatzia kha keini ang hian kan sawi a kan kawh fo loh che u chuan kan chhiatna kha miin an rawn hmu ang a kan kawr chhung an rawn hmu palh ang asin…nangni in lo awm hi a va lawmawm em” a ti a, rang takin a car ah chuan a lut a chu tlangval khawngaihthlak tak chu a tlansan vang vang a…

Chu tlangval dawrawm tak chu a thingthi hnawk a, a kun tlawk tlawk a…

Ka thangharh zui ta a.