KA HMANGAIH LOH ISUA

 

Zaithiam Nunui’n thiam tak maia a sak thin, P.C Lalthakima hla, ‘Ka Hmangaih Isua’ kha tun hma deuhin ka ngaithla fo tawh a. Tun hnaiah ka han ngaithla nawn leh a, uluk zawk a han ngaihtuah hian a ropuiin a thuk ka ti a, thinlung taka he hla han sakpui a har ka ti ta fo mai.

‘Ka hmangaih Isua Ro sum zawng aiin,

Hmangaih zual zel ka duh englai pawhin.’

‘ Nangnin min hmangaih chuan ka thupekte chu in zawm ang…Miin mi hmangaih chuan ka thu a zawm ang a…Tu pawh mi hmangaih lo chuan ka thu a zawm lo’ ( Johana 14:15-24) ti a Lal Isua ngeiin a sawi hian mahni lo inchhal dan chu a rawn sawhsawnin a rawn sawi nghing nasa ta hle a. Ngaihtuahna luah fo tu a ni chho ta.

 

Amah ngeiin thupek zawng zawng a ropui ber, Pathian chu ka thinlung zawng zawng a hmangaih tur a thu min pek leh chumi ‘anpui’ keimah ka inhmangaih ang a ka veng te hmangaih tur a thu min pek te chu amah ka hmangaih leh hmangaih loh tehna tur zawk a lo ni reng si a. A thupek dang te tel hauh lovin hei chauh mai pawh hi kei hian ka tlin lovin ka va tling lo tak em.

Ro sum zawng aia thlan ngai lo hian amah hmangaihna nen hian thlan kawp theih mai se ka ti fo a. Chutiang a duhthusam a hun leh ni ka chhiar lai chuan Amah hmangaihna ( a thupek te zawm) kawngah chuan ro sum chuan kawng a kham chang a awm ve fo si a. Ka nawmsakna leh ka hlawkna tur a nih phawt chuan ka veng te tawrhna leh channa tur lam chuan ka ngaihtuahnaah hmun a chang zo thin lo. 

 ‘Ka hmangaih Isua ro sum neihna turin’ tiin zai ka sa leh nge nge thin.

Ka nawmsakna tur leh ka hlawkna tur lam chu a buk a fual nalh a, ka veng te tawrhna leh channa tur lam chu a chhing ta nalh thin. Aw hian zawitein‘ Nangmah I inhmangaih tur a ni, I veng te aiin’ tiin min rawn hrilh ru sap a. Chhungkua ah te, thenawn khaw veng ah te, thian kawmna leh eizawnna hmunah te chuan chu aw chuan min chenchilh fo a. Lal Isua meuhin thupek ropui ber ‘anpui’ a tih, ‘Nangmah I inhmangaih angin I veng te I hmangaih tur a ni’ a tih chu ka hlawkna leh nawmsakna tur mil a kaiherin, midang tawrhna leh channa a thlen lam chu ngaihtuah chang tawh lovin ‘Pathian malsawmna’ tiin thiam takin ka hmehbel leh thei nge nge thin.

P.C. Lalthakima’n ‘Ka hmangaih Isua’ ti a a thinlung hriak rimtui bawm a han sawhkeh hi kei zawngin ka tlin lova, nitin amah hmangaih tum thar zel chungin  ‘Ka hmangaih loh Isua’ tiin ka lo zawm ve ta zawk a ni.