Chhingmit vai mai maw?

Duhtak,

He chantualah hian zei taka tal vel thinin, changtupa ang maia cheibawla enrawn han ni thin mah ila chutiang letlinga nun dan chu  hrilh tel  ka lo ni ngai si lo. Chutiang a lo thlen hun chuan khuarkhurum mawng, beiseina engin a chhun phakloh a tang ang maiin ka va han tal buai thin tak em. 

Duhtak, thlirtute kut beng thawm phena ka rum vawng vawng ri chu i hre ve thin em?.

An lam rem mil a ka rawl chhuah tura min nawrluihna man an chhiar hi a beitham asin. Patling hrawk kham khawp pawh a nilo. An nuihna atana ka mittui luang hi i hmu thei em? Changtupa in saloon kawngkhar a chhuih hawn ruala puak ruk a hmet tlir ang maia min cheibawl te kha e, anmahni hlimhlawp bawlna tur lek atana an kut beng an lo ni si.

Duhtak, Amah Shakespeare khan “He khawvel hi zawng chantual a ni e” a lo tih kha ka hrechhuak fo thin. Lemchan te hi an tak zawk a a tak te hi lemchan kan nih zawkna, thawnthu te hian a tak an phochhuaha a tak te hi thawnthu ang mai kan nih zawkna ah hi zawng eng hi nge tak a eng hi nge lem hriathran a va han har tehlul em. Amah finthuril lama mi thuk Baudrillard khan a tak nia kan  ngaih te pawh hi a lem a tak cheia kan chei leh sawngbawl mai te an ni tia a lo sawi kha ka ngaihhruat thiam ve chho ta.  Freddy Mercury pawhin "Hei hi a tak ram chu nge suangtuahna ram mai zawk?" tia a lo zawh lawm lawm te kha ngaihtuahna ah  a lo thar a...

Amah Zirsangzela ‘darthlalang’ pawh tluklo he mihring depde tak hi chu aw...Amah Zirsangzela khan a lo ti lawm lawm alawm tiraw Chatuan hawlh thleng phaklo pawn lam mawina zawng a lan mawi tum thin he mihring hi chuan kumhlun lo tur mawina zawng a chhunglam thil te thup in mitdawivaih a tum  si a.

Duhtak, he’ng thil hian a tiluhaiin tuilairap leh mitvaiin a siam ve thin che em? ‘Hlimna’ leh ‘Hlawkna’ te chu ‘an tehfung’ hmangin an siam a, i tehfung ve chu atthlakah chantir a ni si tiraw.

I hmuh theih leh khawih phak ah chuan ‘ a nih dan tur reng’ ni awm in an duh chin an phochhuak a. Mahse a lang lo phena mi chu a tak zawk a ni fo si. He’ng vel avang hian puarpawleng hi a tak emaw tiin i hai ve fo hian ka ring thin.

An ipte chauh chu ‘hlawh-tlinna’ emaw ti khawp a ‘hlawhtlinna’ hrethiamlo te avang hian ‘hlawhchham’ niin i inngai fo a.An tih dan ang chiah chu ‘hlimna’ nia i ngaih thin vangin i lungngai thin tiraw ?

Amah Charles Mackay a ‘Miller of the Dee’ a mi, Dee lui kama Miller pakhat kha hre reng ang che aw...Kha pa naran buhdengtu khan tumahin an awt lo ni khan a hria a, chutiang tluk zet chuan midang a awt lo asin. Chu thu chu zaia a hril rat rat a hriat khan Lal Hal-a khan a lo awt ru hle a nih kha. A chantawka lungawi thei kha ‘miller’ lah kha a lungawina kha a va han tlem tak- a nupui fanau an damtlang a, eikhawp a nei a, a chenna kianga lui Dee chu a tan dam takin a luang si a.

Duhtak, he chantuala midang thawm leh cheziaah hian i mit a vai a, i lu a hai a ‘mi tehfung’ ah kan buai chang hian maw, he miller hi ngaihtuah fo thin ang aw...kan chhehvel thawm avanga buai lovin a kawr nilo a takah chiang ila Lal Hal-a pawh hian a Lalna leh thuneihna aia a thlalhlel zawk kha chu chu a ni tho asin, tehfung pakhata teh theih a ni si lo.

Duhtak, A tawp ber atan chuan Amah, kan kawng leh thutak awmchhun kha i hre reng ang aw.

Duhtak, Julia Zahra pawhin ‘Just an Illusion’ chu la sa rat rat mah se i duhtawk phawt mai ang aw...