Hraite, khawnge i zua ve kha?

 HRAITE KHAWNGE I ZUA VE KHA ?

“Bawihte, i nau kha lo duat rawh aw...tui te kha khawihtir lo la...lo veng tha rawh aw...ka lo chhuak Oh! ka lo haw tep tawh a nia” 

Bawihte i pa in he thu a sawi lai khan a kut lehlamah chuan thir khaidiatin an hling asin! Lehlamah erawh a thianpa phone, a topup neihchhun, a neihthinglungkhawnga a tui thun tih rinhlelh rual loh chu  i pa khan a chelh mek a. , a ban lehlama an hlinna kha a ngaihtuah changlo asin...A be miau che a...khatih hun chhung reilote kha chuan a aia ‘zalen’ an awm biklo asin, a be miau che a…

I pa hi ‘zero’ a nihna lai chauh hi keini ho hian hmuhsak mah ila nang chuan i tana ‘hero’ a nihna hi hre reng thin rawh aw...i lo leikang deuh ang a, miin i pa hi tawmkailo tia an entleu ni a lo thlen pawhin i tana hmar arsi a nihna hi hmuh hmaih ngai suh aw...Mi tuemaw ‘terrorist’ pawh hi mi tuemaw ‘freedom fighter’ a ni maithei asin…

I pa thianpa mawlh hi theihnghilh ngai suh aw...kan nun a mi pawimawh ber ber te hi puipun nikhuaa dawhsan kai phak te ngawt hi an nilo a nia, an ni lo deuh fo zawk hial ang...A neihchhun tak meuh meuh smartphone pawh ni phalo, mah se a mah kha a va smart si em bawihte...I pa khan nangmah a fanu duatlai a biak theih phah che asin…kha hun reilote vanram tenau ngei mai kha...

I pa hian a lo haw oh! a lo chhuah hunah chuan kawr mawi leh inkhualtelemna thil lo hawn tur che a nei dawnlo a nia aw...Mah se amah amah ngei mai kha i bulah a lo la haw dawn asin...par thi nen in khaw kawtkaia lo hmuaktu a mamawh lo a, in chhawng sang leh silhfen tha a thlahlel heklo, a thlahlel ber chu in unau chauh a ni, a neih chhun rohlu chu, zero emaw hero emaw…

Bawihte Uirenu uire lai tak an man khan a thiltih kha a sual lo a nilo, mah se a sualna aia sim tlak a la nihna lai hmuhsaktu dinhmun angah khan din fo tum la, i pa hi zero a nihna hian a nihna pum hrilhfiah lo la i hero a nihna lai hi hre fo rawh aw, i pa a ni miau a…

Nang leh kei pawh hian ngaihhnathiam leh khawngaihna vang a vawiin thleng hram hram kan nih hi tiraw, kan thil tih phu tawk zela dawng tur ni ila chhungte leh hmelhriat ta ban chawp chung pawhin puk pkhawm ngial ila, chuti chung pawhin tun dinhmun kan thleng phaklo hial ang…

Bawihte, i lo seilian ang a engtik niah emaw chuan i pa te tun dinhmuna an dinna ah hian keini hian mawhphurna lian tak kan nei ve bawk a ni tih i la hria ang a, chumi hunah chuan, nilo i hmuh thiam hunah zawk chuan i pa te dinhmun ang a ding te tana ‘freedom fighter’ nih tum ngei ngei rawh aw tuemaw ‘terrorist’ ni dawn hial mah la...Hre reng rawh aw kan ‘freedom fighter’ kha...Bawihte...