Kalama leh Kamlala

Kalama hi Rameswaram thliarkar, Tamil Nadu a piang niin India scientist chhuanvawr, ‘missile man’ tia hriat lar a a ni a, chu ai mah a a hmingthanpui chu mipui te President ( people’s president ) hi a ni zawk mah awm e. Kamlala hi Khawserhsang Tlang chhuahlam Ngurlen khuaah 1902 ah piang thung a. 1932 thleng zirtirtu hna a thawk a, 1932 ah  Thlarauva danglamna avanga a chan hnuin a bang a, Mizo irawmchhuak Kristian hla phuahtu pathumna nia sawi a ni a. Mizo Kristian hla a kutchhuak tamtak a awm. A tello in lengkhawm mai nilo  Mizo Kristian inkhawm zai a tui theilo.

Kamlala hi a pian hlim hian a pa in pensil a humtir a, lehkhapuan te a leisaka. An khuaah lehkhathiam an la awmloh avangin Kamlala chu kum 10 mi a nih in an khua a  lehkhathiam awmchhun Hangpawla chu private zirtirtu atan a laksak a ni. Kum 5 mi lek a nih laiin Zosap khaw fang a hmuh chuan a rilru a khawih hle a. A pa in kekawr tlawn dum a thuisak chu Zosap lem chan nan a hmang thin.  

Kalama ve thung hi a pa in tuktin hma takah an coconut huan te tlawhin a  vah harhpui thin a. Chutia a pa ban a kai a han vah harh vel chu thil hlimawm a tling takzet niin a sawi.A pa hi sakhaw mi, mi ten harsatna an neih a an pankhawm thin a ni a. A fapa in chutianga mi in an pan thin chhan a zawh chuan mitin hian harsatna kan nei a puihna kan mamawh a.Chutiang hunah chuan tawngtaina nen phurrit chhawk tura kan inpuihtawn a tul tiin a chhang a.A fapa Kalama nun hi a khawih em em a, kum engemzawt a vei hnu, a puitlin hnu pawhin a kawt a Arjuna thing kum 100 vel zet a upa chu a pa nen a tehkhin thin a. Zing vartiana a thawh a, sava ten buk sakna atana an hman a an mamawh huna an lo pan khawm thin chuan a naupan laia a pa midangin an mamawh a an lo pan khawm thin chu a hriatchhuahtir a ni. 

Tum khat dang leh chu thlipui in Kalama te khua hi a nuai a. Thliarkar a cheng tihtakah lawngleng te siam a veivaka eizawng te an ni a. A naupan tet atanga a hmelhriat, an lawng chu a tuknaah pawh kutthlak ve ang maia a inngaih chu thlipui chuan a nuai chhe vek mai a. Mangang taka hlauhlawpa a pa a va en chuan a pa chuan zam hmel a lo  pu hauhlo a. Amah Kalam an a sawi danin kum tamtak hnuah missile project lian tak tak te enkawla harsatna nasa tak in a nuai hun a lo thlen chuan a naupan laia a pa in zam hauhlo a thlipui a hmachhawn pui chu a inzirna pawimawh tak niin a sawi.

Kalama leh Kamlala hi kawng tamtakah inpersan tak niin rinna kawngah hrui khat vuan lo mah nise an nun ah hian an naupan lai huna an thil tawn leh an pa te kaihhruaina hian a hnu zel a sulhnu pawimawh a neih dan hi thil pawimawh tak niin a lang.

“Naupang chu a kalna awm kawngah zirtir la, a puitlin hun pawhin a thlah lovang” Bible in a lo ti mathlawn lova.