Mi thutlukna siam apiang um e ngailo

He thupui hi Mizo hmeichhe Rapper fam ta Rdi hla  atanga thurchhuah a ni a, ngaihtuah zui tul tak, mimal, ram leh hnam ang a hma kan sawnna tur a kailawn pawimawh te zing a mi niin a lang.

India ram President leh Scientist ropui, a ngilneihna leh a ze danglam tak avanga  'mipui te President' ( People's President) ti a hriat hlawh, APJ Abdul Kalam khan chanchin danglam tak mai a nei a. A secretary ni thin, kum 24 lai mai lo hrawntu, H. Sheridon chuan Kalam nen khan inpawh leh zalen taka an titi fo thin thu a sawi a, Kalam bulah chuan 'aw' emaw 'aih' reng reng  chuan tanchhan te, a chhan leh vang te, a chang phei chuan entirna thlengin an neih tel a ngai thin tih a sawi. Kalama ngaihdan chu a tawmpui loh hun a lo thlenin tanchhan tha tawk Kalama hmin thei a chhan leh vang tha tak nen a neih theih chuan chu chu an inthianthatna atana thil duhawm tak a nih thin thu a sawi bawk.

Tum khat chu phai lam atangin Research bei a lo kal pakhat hian thalai hrang hrang leh tlawmngai pawl thenkhat a hruaitu te a kawm kual a. Chu a thil tawn atanga a hmuhchhuahah chuan " A tlangpui thu in thalai te hian nu leh pa leh thuneitute thu hi in zawm tawp a, ngaihdan dang neiin in kalh (dissent) ngailo niin ka hmu" tiin a sawi a. He a thil sawi hi dik diak diak lo pawh ni se thui tak chu a pawm tlan theih awm e.

Kan institution hrang hrang chhungkua a nu leh pa atanga kohhran leh khawtlang te, tlawmngai pawl hrang hrang te thu te a dikna leh pawmawmna te chu zawt let (question) emaw a dinna a dik leh dikloh cho ( challenge) turin kan inzirtir tam lo niin a lang. Thuneitu (authority) chu zah tur a nih chhan leh zawm tur a nih chhan diktak hre thei lovin a dik a dawk thlu lovin dik lo theo lovah kan ruat a, kan pawng zawm  fo thin.

'Fel' kan tih te hi a kawi a ngil a mi thu zawm thei, a a dik leh dik loh te, belhchian dawl leh pawmawm a nih leh nih loh ngaihtuaha ngaihdan fel tak nei lemlo te hi an ni fo a. Chutiang ep a ngaihtuahna fim tak nen chik tak a ngaihtuaha nghet taka ngaihdan fel tak nei a ding nghet tlat thin, mi ngaihdan ziding ang nilo ngaihdan nei  te chu 'khirh' emaw 'nasa' emaw 'sual' ah kan chhuah (label) zung zung mai thin.

Hemi kan sawi hian thuneitu (authority) lakah chuan pawng hel tur emaw a thu awihlo a ngiaungerh hrim hrim tur tihna a ni lova. A dinna chu a dik reng em, a tha em, belhchian a dawl em, a pawmawm em, a lai em tih te chik takin kan ngaihven thin tur a ni.

Chutiang ni lova thui tak kan kal chuan kan mimal ah leh khawtlang nun ah nget a lo awm thuai thuai a, kan rinna atanga kan khawtlang nun leh politics thlengin ngaihtuahna fim, ze nghet, mahnia tak chet chawt nun neihna kawng zawh theihlohna ah min thlen thuai thin.

Kohhran siamthatna atana thawh hlawk tak zing a mi Martin Luther te khan a hunlaia thuneihna sang tak leh mi chung en, tawh thiang lova an ngaih, Kohhran  siamthatna hna a thawh khan  kalsual, mi diklo niin a thih atanga kum engemawzat thlengin kohhran khan a ngai a. Kohhran siamthatu ropui tak a nihna kha a hunlai khan a chang lo mai ni lovin a nun kha a khawharthlak hle ang.

Kan mamawh chu mi thlek na lam lam a thle dual dual ni lo, Kalama te ang a a chhan leh vang mumal tak nen a thutlukna siam ngaisang mi hi an ni a. Sakhuana lam emaw politics emaw mimal nun ah a ni emaw ' mi thutlukna siam apianga um e ngailo' hi kan mamawh a ni.