I hna kha i tlin lo a ni tiraw?

Kan zirtirtu i ni a, sikul kawt a zirlai intlar thap endiktu zirtirtu dang zingah khan i tel thin a. Tum vang reng nilo in a chang chuan lu a lo buk deuh chang te, a duh fir deuh chuan a 'punk' an tih tur te kha a nih chang a awm ve thin a. 

Kan tluk leh tlak hun an chang a, an chan chhuah tum chuan an lawm em em emawni tih tur khawp a rorelna talhfiak lek chak thenkhat an awm lai khan nang chuan min man a min hrem ngawr ngawr kha i tum ve lova. Chutiang hunah chuan hai derin tawngkam tha khan zawi te in min kal pel pahin, 'i dinna ah hian ka ding ve tawh thin asin' ti hmel pu tak hian dam takin min lo hrilh thin.

Tehfung ziding atang chuan i hna kha i tlin mawlh lo! Nun kawng chhuk chho i zawhna tinreng atang khan hringnun hi i lo zir bik a. Hringnun leilawta i pil vang vang na atang khan nang chuan midang hriatthiamna leh khawngaihna thiltihtheihna te hi i lo zir daih tawh a. Keini naupang lungmawl bulah khatiang taka ril leh thuk kha i lo tuh tawh bik a ni.

Mi chuan an chanchin ropui leh chhuanawm te an lawrkhawm a, pressure cooker a min chhum hmin tum ang maiin midang fuih nan an hmang a ni ngai a. Nang erawh chuan i chakohna te i tlinlohna te kha keini zirlai bulah khan i tarlang a. Hun harsaah pawh beidawng lova bei hram hram tur khan min fuih thin a. Zirtirtu ve si min fuih thinna i chanchin te kha a va chhuanawm loh. I hna i tlin hlawl lo!

Nang pawh hian i hna hi i tlin mawlh lo a ni tiraw? Zirtirtu tho i ni a, sikul naupang thla tin fee pek  khawn khawm chu i kut a awm a ni a. Hunbi tiam chhung a sikul fee pe tha lo te chu an thiante zingah an hming lam chhuakin dintirin fee pe thuai thuai tur a vau leh rikrap tur a mawhphurhna nei i ni.

Chuti chung chuan keini ang, thla thar hlim a sikul fee pe theilo zirlai te khan fee kan pek loh kha i haider thin a. I hna kha i tlin hlawllo! Tehfung ziding atang chuan i va han lak tlak loh tak em! Nimahsela i zarah, i zar liau liau ah hian keini ang zirlai, khatiang dinhmun a ding tamtak khan khaw eng hmuh hrehawm lutuk tur tamtak pumpelhin lehkha kan zir ve theih phah a. Kan tan i hlutna hi nambar a teh tur ni se a teh chhuak zo ngai lo ang.

Huaisenna hian tlin lo fo mah se nangni ang a hna tlin lo nih hi ka chak ber a la ni fo thin.