Vantlang Phurrit : Petrol Inchuh

Tin heti hi a ni a…

Kum 1833 khan British economist pakhat William Forster Lloyd chuan thil pakhat ngaihtuah ti thui tak mai a chhawpchhuak a, hetiang deuh hian a mitthla theih awm e. Khaw pakhat ah hian mual hring cham put mai hi a awm a, chutah chuan mi 100 in bawng 10 theuh an tlattir thin a. Chu mual chuan an bawng te chu a chawm tawk vel a, a mual hrin leh chhung thu ah pawh harsatna a awmlo a ni.

Mi pakhat chuan a mimal hlawkna um avangin bawng dang a vulh belh leh chuan an zavaia tana tha tawk  (socially efficient level) kha a nek buai a, chu mual chuan a dawl/chawm zo dawnlo a ni. Chu mai bakah midang pawh chu mahni hlawkna duh belh theuh an ni a. An ran tlatna mual in a dawl zawh chin ngaihtuah lova an mimal hlawkna theuh an ngaihtuah a, vantlang phurrit an ngaihtuah telloh chuan innghirnghona nen an zavaia tan hlawkna aiin chhiatna a thlen thei  zawk dawn a ni.

Mi tuemaw chuan an ran tlatna chuan a dawl loh avang leh mual te chu a khawro zawh dawn avangin a ran vulh chu ti tlem se, midang tuemaw chuan chu chu remchang ah la a a mimal hlawkna um a bawng dang a vulh belh tho si chuan vantlang phurrit chu a thlen tho tho dawn a.Mahni tanghma ngawt ngaihtuah chu keimahni theuh in kan tuar dawn tho a ni .  Vantlang in thil kan intawm chu ‘commons’ ti a sawiin William Forster Lloyd chuan he thil hi ‘Tragedy of the Commons’ tiin a sawi a ni.

He thu behchhan deuh hian American Political Economist, Elinor Ostrom , Economics a hmeichhe Nobel Prize dawng hmasa ber chuan 1990 khan ‘Governing the Commons’ a ziak a. Ostrom hian khawvel hmun hrang hrang ah vantlang thil – ram ngaw an hman dan te, sangha an man dan te leh vantlang thil dang hrang hrang an hman dan te zirchianna neia a zinkualna atangin he thil  an chinfel dan pakhat hi a hmuchhuak a. 

Hmun thenkhat ah chuan Sorkar inrawlh a, dan hmang  a khap kher ngai hauh lovin khawtlang mi te chu  an mahni an inthunun ( self regulate ) a. Chu an inthunun theihna chu mimal duh dan leh hlawkna ringawt ngai pawimawh lovin midang nen an khawsak ho dan te, vantlang thil (shared resource) hmang turin midang nen tawlhrem tlang a insum te, lungrual taka thiltih atang chauh chuan vantlang phurrit pumpelhin hlawkna tluantling a awm thei a ni tih ngaihtuahna rilru puitling tak atanga chhuak niin a ngai.

Petrol inchuh leh vantlang phurrit

Entirna atan petrol lei tur hi tualchhungah stock litre singkhat awm ang ah ngai ta ila. Rokhawlhna engemaw vangin phai lam atanga petrol lakluh chu a lo chatlak ta a. Naktuk emaw tunkar tla lirthei a thun sa nei lo, khaihlak mai tur engemaw zat kan awm ngei ang. Chutih laiin tunkar emaw ni hnih ni thum tla lirthei a petrol thun sa nei engemawzat kan awm bawk ang.

Chutiang zing ah chuan a tlachawpa mamawh ni miahlo, a vang dawn a ni tih vang a mamawh bak chhek tum khan kan han chuh ve ta vak a, a mamawh ngawih ngawih te chan ai kan chhuh a, kan mamawh chawpchilh bak kan chhek bawk a. ' shared resource' kan neih sa atang chuan kan mamawh phuhru tur bak kan va sawh hek atang chiah khan buaina chu kan insiamchawp ta thin a ni. 

Petrol litre singkhat awm sa hi mamawh chawp te te in insemsawmin midang a mamawh zawk inngaichang tlang thei ila, hman khawp la nei ten kan neih sa hmang ila phai atanga lo lut chatlak chhung kan tlak tur emaw rokhawlhna awm chhung kan phuhruk theih ah khan kan duham tlanna avang leh kan in ken theihlohna te leh kan inrinloh tawnna te avangin harsatna kan siam chawp ta thin a ni. 

Hetiang ngaihtuah a midang kan ngaihtuah theihlohna leh kan mimal tanghma chauh kan umna zawk avang hian 'petrol vang' chu kan siam chawp in kan belhchhah ta thin zawk a. Chu chuan keimahni vek min vaw let ta thin a. Hetiang thil hi petrol chungchang ah chauh nilo midang nen kan khawsak ho na tinreng ah hian a thleng mek zel a ni.

I ngaihtuah nawn ang…

Kum 100 chuang Zofate’n Kristianna hmel kan hmuh hnu hian van lam hawi, a tungchho  bakah hian he lei ah kan mihring pui te leh thilsiam dang tinreng te nen kan khawsakhona  ah hian a  khamphei a kham chhuah tel deuh deuh a tul hle mai. Kan thiltih tehfung atan amah Lal Isua’n thupek zawng zawng zing a ropui ber a tih dawt chiahah a tlukpui ni a a sawi “ Nangmah I inhmangaih angina I vengte I hmangaih tur a ni” a tih hi ngaihtuah nawn fo a tul hle mai.

He leilung kan luah chhung a hmasawnna te, hlawkna zawng a ke kan penna kawng tinreng ah hian keimahni bil aia thui zawk ngaihtuah thlen deuh deuh a tul fo mai. He leilung a thil tinreng te hi a neitu tak tak ah hian chiang ila, a lo kawl leh a lo hmangtu hian kan hman dan hingaihtuah nawn fo ila.