THAWNTHU PATHUM, THIL PAKHAT

Kum engemawzat kalta khan Australian naupang pakhat chu kut leh ke neilo in a lo piangchhuak a, a tan a nunkawng sual chhoh dan chu a hautak khawp mai. Kum sawm a lo nih chuan beidawnna avangin inbualna (bathtub) ah tui tling a inchiahhlum a tum hial a, mah se chutia a tum lai chuan a chhungte hrehawm ti tur leh a thihna avanga mawhphur nia an inngai tur chu a ngaingam lo a a thulh leh ta a ni.

 Hun leh ni lo inher zelin zirna kawng te a zawh ve zel a. High School a lo thlen chuan kum 17 mi a lo ni ta a. A nun a thil danglam thlentu a tawng ta tlat mai. Chu chu tu dang nilo in an sikul tifaitu leh enkawltu (janitor) a ni. An sikul tifaitu chuan mi hmaa thusawi tur leh a rinna leh harsatna a hmachhawn dan te puangchhuak a midang chotu ni turin fuihin a cho a, chu fuihna leh chona chu a nun a mel lung pawimawh phuntu a lo ni  chho reng mai. He a chanchin kan sawi hi tu dang nilo in motivational speaker ropui Nick Vujicic a chanchin a ni. Ram hrang hrangah thusawi tura sawmna 35,000 lai a dawng tawh a, ‘Attitude is altitude’ tih company dinin Ministry a din bawk a, Youtube lamah a video te chuan entu an ngah hle bawk.

South Africa ah chuan tleirawl pakhat a awm a. Lehkha zir la chak em em mah se a nu chuan a hna a chan hlauh mai a. A pa awm tawh lo nen an mangang em em a. An chhungkaw enkawl chu a ko ah a tla tih hre mah se lehkha zir zel a, tangkai zawk nih theih a beisei bawk si. Chutia rilru buai leh hah em em a a awm mek lai chuan a harsatna chu dawrkai pakhat hnenah  sawiin pawisa puk (loan lak) a dil rawih mai a. Dawrkaipa chuan a dinhmun chu lo hriatthiam puiin sum fai erawh chuan a pek loh tur thu leh a lehkha zir chhung zawng a chhungte chuan a dawrah an mamawh te a ba a an lo lakna tur lehkha a pe ta a ni. 

He tleirawl hian lehkha a zirchhuaha a leiba rulh a va tum chuan dawrkaipa chuan “Rulh a ngai love i chunga thil thleng ang hian mi dang chungah ti ve mai rawh” a lo ti mauh mai a ni. He tleirawl, dawrkaipa tanpuina a lehkha zir ta hi tu dang nilo in Raymond Zondo, South Africa Deputy Chief Justice lo ni ta hi a ni.

Isua khan mipui ei tur chhang per panga leh sangha pahnih a tihpun khan mipa naupang khan a neih chhun chhang per leh sangha kha a nu in a paitir ve liau liau emaw a ni maithei. Phal takin midang tan a pe mai a, tipung theitu in a lo tipung ta a ni. Kha mipa naupang kha tunge a nih Bible hian min hrilh zui tam lo khawp mai. A pawimawh ber a nilo a nih a rinawm.

A pawimawh zawk ni a lang chu, eng ang mi pawh ni ila, kan theih leh neih chu a lian emaw a te emaw midang nun ah engtiangin nge nghawng kan neih a, enge kan hnutchhiah tih zawk hi a ni fo thin. Engtia tam nge ka lakluh tih aiin engtia tam nge ka pekchhuaha, miin Isua hmel an hmuhna hmanrua kan ni ve mial em le?

A chunga kan sawi tak a phena mi tangkai te hi degree sang ber ber, in  chhawng sang ber ber niin dawhsana parthi awrh thin an ni kherlo maithei. Khawvel tan mi pakhat ve mai mah nise mi pakhat tan chuan khawvel an ni ve tlat!

Yes, superheroes are for real...