Open letter to nangmah

Duhtak nangmah,

Heti hian i ngaihtuah tawh ngai em ? Kha ti  ve tawp a i awm a, beidawn chhan tur hre bik miah lo a i lo dam ve zel khan mi tuemaw chuan dam hi a zuam phah mai ni lovin hringnun hi beidawnsan a, bansan chhan tur a hriat bik loh phah asin. Mi tuemaw tan chuan i tangkai a, i thawhhlawk zia hi ngaihtuah teh. 

Heti zawng hian i ngaihtuah ngai lo mai mai a ni.Vantlang puipunna hmunah dawhsana ding a, parthi awrhtir i nihloh vang emaw, khawi lai  intihsiakna ah emaw i hming chu  a hmasa zingah emaw  ziak a nih ve loh vang ngawt khan tangkaina neilo leh tawmkailo i ni lo asin. Heti zawng hian i ngaihtuah ngailo mai mai a ni. 

Hman a tlangval huaisen, tui tla chhanchhuaktu, mi huaisen  chawimawina  an pek ai khan i nep bik miah lo. I lo dam ve tawp khan tuemaw tan dam hi i tizuamawm asin. I zarah mi tuemaw chu a dam mai a nilo, a nung hial asin! Dawhsanah dingin parthi i awrh lo a, mi in i pualin kut an beng lo mai chauh a ni.

Mi tuemaw tan chuan chu  aia pawimawh zawk chu i ni asin. Khawvelah hian mi pakhat ve mai niin i inngai a, mi pakhat ve mai tu emaw tan chuan khawvel i ni asin.

Ka thusawi hi i awihlo a nih chuan heti hian han ngaihtuah chhin teh! I nunkawng a sulhnu pawimawh neitu kha han ziak tlar la, khawvel pangper  letliama mi hmingthang te emaw, intihsiakna mual a thangchhuah rual te ngawt hi an nilo tih i chiang ang. Chutiang mi te chu an nilo mai ni lovin anni ang chu an  nilo deuh ngat ngat zawk hial maithei.

Ekzam rizal chhuah nia a phek mawng a i hming tlarpui thin i thian te, ding chhuak zo tawhlo tur hial khawpa  i inngaih laia i dinhmun ang a ding thin, tluk leh tlak fawmkem a damkhawchhuah sual hram hram a dingchhuak leh thin te an nih kha hma lam pan zel tizuamawma fuih phur thin tu che

Khawilaiah emaw, eng thilah emaw, engtin emaw, mi tuemaw i tawn chu engtin emaw, eng kawng takin emaw i tana a hlut dan kha han ngaihtuah teh. Nangmah vang hian mi tuemaw chu a nui asin. Nangma'n i hre lo mai chauh a ni.

Khawvel hian mi filawr bik te inhrosa thawm ngawt hi ngaihnawm a ti lo a, a damkhawchhuak ngawr ngawr te paltlang zinkawng hi a ni thawnthu ngaihnawm chu ni fo ni.

I lo dam ve hrim hrim khan i chhungte  leh thiante khan hauh tur an neih phah a ( awmlo chiah la  an khawhar tur zia mai chu )

I lo dam ve hrim hrim khan mi ropui te i ti ropui a ( keini ang mi naran leh mi nawi hi awmlo ila mi ropui leh mi bik te hi mi naran vek an ni dawn asin. Keimahni vang a ropui mai an ni )

I lo la dam ve hrim hrim khan i thian nawi ve deuh deuh ten i chanchin thing deuh deuh an sawi ni a lo chhang let tu tur i la awm khiau asin ( I awmloh vaih chuan i thian nawi deuh deuh ten i chanchin thing tak tak bakah tlem phuahbelh a an han perh vel tur che hi aw pawi tak a ni ang pawi tak ! )