RUATA PAWH A FAIL VE THO

Tum khat chu kan lehkha zir pui thin kan thian pakhat hi an veng lama kan thianpa tho nen an inhmuh tumin eng dang sawi set set lo chuan “Ruata pawh a fail ve tho” a lo ti thawr mai a ni awm e. A ni fail in keia fail thu chu engah nge maw a sawi kai teh ngawt ang aw ti a ka ngaihtuah neuh neuh hnu chuan thil ngaihtuah chhuah ka nei ta.Ka va han nui nasa tehreng em!

Tum khat chu kan u fanu pakhat, pawl 3 zirlai hi sikul a an test na result an sem a. A lo che tha tehchiam lo a ni ngei ang. A box ah chuan pencil in a aia tichhe ho mark a chhinchhiah tlar dul mai a. In a lo thlen chuan a pi bulah a mark hmuh zat a sawi hma in a aia tichhe ho mark a chhinchhiah tlar chu a hmuh ta thak mai.Hauh a va pumpelh chiang tehreng em.

A ni tak a, mi hlawhtling leh mi ropui tak tak chanchin te aia keini ang tho a hnung a kawlek kan thai pui te hian nun an tizuawmawmin a tuk a thawhchhuah hi an va ti zuamawm tak. Sikul kal lai pawhin a chhip lama hming intlar ai chuan a tawp lama kan hming bula intlar ho bawk kha sikul ban a chhungte hmel hmuh tizuamawmtu an ni tlat. Anmahni vang hian beidawng lova bei ve bek bek zel a, zirna tawpsan ngawt chhan tur hre biklo kha kan ni tlat. Anni aia nuntizuamawmtu tunge awm chuang ang?

Tangkaina neilo riau leh thawh hlawk lo riau a i inngaih chang khan heti hian han ngaihtuah teh. Mi tu in emaw a lo thlamuanpui che a, amah ang tho beidawng a, tawpsan a, a tuk a thochhuak ngamlo khawp a a thlen china kut nghat mai lo a, a ke pen zelna atan amah ang chiah beidawn chhan tur hre map lo a dinhmun anga ding lawi si a hmuh che khan damkhawchhuah ngawr ngawr hi a zuam a, a nuntizuamawmtu i ni asin.

Mi fate'n result chhuah tuk a ban kham ur khawpa lawmpuina chibai an dawn lai pawha lo fail ve ngawr ngawr pawh kha kei ang tho a fail ve tan chuan khatah khan tawpsan mai lo a, thochhuak a kal leh zel tura tiphurtu a lo ni ve thei tlat asin.I tawpna leh tlukna ah khan thochhuak lo in beidawng ni la nangmah ang tho dinhmun a ding tan khan chona i ni thei dawnlo asin.

Khatia ka tawp san chhan tur ngawt hre bik map lawi si lo a ka lo fail ve thawr kha kei anga vaihna vartiana vakvai mek tan nuntizuamawmtupa ka ni ve tlat. RUATA PAWH A FAIL VE THO!